الذكاء الاصطناعي GPT .. هل له عيوب؟؟
انتشر مؤخراً الحديث عن ال GPT- الذكاء الاصطناعي طورته شركة open AI الأمريكية الناشئة وهي منظمة بحثية في مجال الذكاء الاصطناعي تتمثل مهمتها في إنشاء نظام ذكاء اصطناعي آمن ومفيد.
وده برنامج مزود بقاعدة ضخمة من البيانات تصل لمئات البلايين من الكلمات، اللي تقدر بيها تعمل حاجات كتير فوق التوقعات عن طريق روبوت بيجاوب عليك، وده اللي مميز برنامج GPT عن أي برنامج تاني زي SIRI عشان هو مصمم ك شات فوري يجاوب على أي تساؤل وينفذ أي طلب لأنه مصمم ليقوم بعمل المخ البشرى ويجاوب بطريقة بشرية وبلغة قريبة من لغة كلامنا.
ده غير انه قادر يقوم بوظايف كتير انت مش متخيلها، بهدف انه يقلل الوقت والجهد سواء في البحث عن معلومة أو أنك تكتب حاجة مش موجودة أصلاً، وده اللي خلى ايلون ماسك يقول عنه انه (جيد بشكل مخيف).
ايه اللي الذكاء الاصطناعي GPT يقدر يعمله؟
البرنامج يقدر يعمل حاجات كتير بلغات متعددة زي:
- الترجمة لأي لغة في العالم Translation
- البرمجة coding
- تأليف قصائد أو قصص Context
- عمل تصميمات صور احترافية Designing
- تلخيص النصوص Text Summarization
- تحليل المشاعر Sentiment Analysis
- الإجابة على أي سؤال في أي مجال Answering
إيه مميزات الذكاء الاصطناعي GPT؟
الذكاء الاصطناعي GPT هيغيَّر من حاجات كتير في حياتنا لأنه مزود بمميزات كتير مريحة وموفرة لوقت وجهد كبير، اللي كنت بتعمله في ساعات هتلاقيه قدامك في ثواني معدودة.
من المميزات اللي يقدر يعملها:
1- البرنامج مجاني، ولكن يٌعتقد ان هيكون فيه رسوم في المستقبل نظراً لتكاليفه العالية
2- متوفر بكل اللغات حتى اللغات الصعبة التعلم
3 مش محتاج الاتصال بالانترنت
4- قادر على تحليل البيانات بشكل متميز، فهو مفيد في المجال الاقتصادي والمشاريع الرقمية
5- بيوفر وقت ومجهود البحث والحصول على اجابات دقيقة في وقت قياسي
6- كتابة عقود عمل أو تقارير وأبحاث أكاديمية
ايه عيوب الذكاء الاصطناعي GPT؟
بالرغم من الضجة اللي البرنامج عاملها، لكن كأي حاجة بشرية فيها عيوب وأخطاء، ومنها عيوب تخص بلادنا ولغتنا العربية زي مثلاً:
- مش متوفر في الدول العربية، إلا لو دخلت ببرنامج زى vpn ومش كل الناس بتعرف تعمل الخطوات دي.
- المحتوى العربي جيد لكن مش ممتاز.
- الترجمة من اللغة العربية إلى اللغة الانجليزية غير دقيقة.
بجانب عيوب البرنامج نفسه زي:
- قد يقدم معلومات خاطئة بسبب اعتماديته على البيانات اللي عنده.
- البيانات غير مُحدثة من 2021 في النسخة التجريبية.
- التحيز، قد يكون غير حيادي في بعض الموضوعات بسبب الداتا اللي داخلاله لو كانت بإتجاه معين.
- مدة الانتظار قد تكون طويلة بسبب كثرة الضغط على دخول البرنامج واستيعابه لعدد محدود من المستخدمين.
هل وجود الذكاء الاصطناعي GPT هيأثر علي جوجل؟؟
GPT VS Google
بدأت مخاوف تظهر بخصوص جوجل، هل الذكاء الاصطناعي GPT بيهدد فعلاً جوجل؟
الحقيقة ان ال GPT مصمم لتقليل الجهد والوقت في البحث والحصول على بيانات دقيقة في نفس الوقت، وده عكس جوجل اللي بيقدم عدد كبير من الصفحات اللي ممكن تتنقل بينها ونحكم على المعلومات المُقدمة ليك.
بعض الناس بتفضل الاجابات الدقيقة المختصرة بدون جهد وتعب في البحث، خصوصاً ان البرنامج بيديلك احساس انك بتتكلم مع خبير مختص في الجزء اللي انت بتسأل عنه، وده هيكون تحدي كبير قدام صناع البرنامج لتقديم معلومات دقيقة وصحيحة بنسبة 100%.
ولكن يظل البعض الآخر من الناس بتحب تبحث بنفسها ويبقى عندها مصادر متعددة بصفحات معلومات أكتر ومصادر أكتر.
هل الذكاء الاصطناعي GPT بيهدد القوى البشرية العاملة؟؟
الحقيقة ان ده التخوف الأكبر عند كل الناس، لأن البرنامج بيقدر يقوم بأدوار بشرية كتيرة، يقدر يكون المُصمم والمؤلف والمبرمج، يقدر يقوم بكافة أنواع الكتابة، وأعمال السكرتارية وخدمة العملاء، وغيرها من الأعمال.
ولكن عامل الخطأ الوارد حدوثه والاعتماد الكلي على روبوت مزود ببيانات انت اللي عاطيهاله يعتبر نوع من أنواع المخاطرة اللي صعب ان كل الناس تخوضها.
وده يخلينا كمان نكون حذرين في التعامل مع الطلاب المدرسة لانهم ممكن يصابوا بخمول عقلي لو استخدموا البرنامج، مش هيكون فيه داعي للمذاكرة والحفظ واسترجاع المعلومة أو بذل مجهود في حل الواجب.
في الآخر القرار هيكون ليك تعتمد على روبوت ال GPT ولا القوى البشرية العاملة!