5 مميزات وعيوب العمل الحر ك فريلانسر
انتشر مؤخراً شغل الفريلانسر في وطننا العربي، وده نظراً لظروف كتير أهمها أزمة فيروس الكورونا اللي أجبرنا كلنا نقعد في البيت في ،2020 ووقتها اكتشفنا قدرات ومواهب ممكن تأهلنا نشتغل فريلانسر freelancer، خصوصاً ان السكك والمجالات بقت مفتوحة جداً للمجال ده، وفيه منصات كتير بتدي كورسات مختلفة في مجالات كتير ممكن تشجعك.
ودلوقتي هنستعرض مع بعض اهم مميزات وعيوب شغلك ك فريلانسر، عشان ضروري تكون عارف أهمية وخطورة الخطوة دي قبل ما تاخدها:
مميزات العمل الحر ك فريلانسر:
1- أنت رئيس نفسك
مافيش حد متحكم فوقك، انت المسئول الأول عن يومك وعدد ساعات عملك، ورأيك هو اللي بيتنفذ بذوقك واختياراتك انت -بعد الاتفاق مع العميل طبعاً-، هتكون انت ال upper hand علي نفسك بدون HR ولا غيره.
2- وقتك ملكك
انت مش مضطر تصحى بدري عشان تلحق ميعاد الحضور، ولا مضطر تقدم على اجازة طويلة لو عايز تسافر، انت سيد يومك بال 24 ساعة كاملين تقدر تقرر امتى تصحى وامتى تنام، وكمان مواعيد اجازاتك وسفرياتك، ده غير انك هتلاقي وقت أطول تقضيه مع عيلتك لما تنظم وقتك.
3- مافيش مواصلات
غالباً مش هتكون مضطر تركب مواصلات في الزحمة عشان تلحق ميعاد الشغل -إلا لو حبيت تشتغل من مكان بره البيت-، ولا مضطر تقوم من تحت البطانية في يوم ساقعة عشان تنزل بدري، مش مضطر تنزل في الشتا، ولا تستحمل زحمة السكك.. هتوفر تمن البنزين أو المواصلات.
4- هتتعب وهتلاقي مقابل
عكس أشغال كتير ممكن تتعب ومتلاقيش مردود كويس، أو مهما تتعب متلاقيش المقابل المادي اللي تستاهله، انت ك فريلانسر بتتعب وبتبذل مجهود والعميل بيدفع، وده منتهى العدل، عكس الشركات اللي مرتبك بيفضل ثابت سواء ضاعفت أو قللت مجهودك.
5- بتعمل حاجة بتحبها
ودي أكتر حاجة جميلة لما تشتغل الحاجة اللي انت حاسس بشغف ناحيتها، ومجهودك رايح لنفسك مش لشركة ولا شخص تاني، فتحس انك بتستثمر مجهودك لمستقبلك فعلاً، وبدون ماتكون حاسس انك مضايق بالعكس عندك شغف تطور من نفسك دايماً عشان توصل لنتايج أحسن.
ده غير انك ممكن تعمل براندنج لنفسك ومتستناش حد يتكلم عنك، انت اتكلم عن نفسك.
عيوب العمل الحر ك فريلانسر:
1- الدخل مش ثابت
ممكن في شهر يكون دخلك كبير جداً وفي شهر تاني دخل قليل أو معدوم، لأن معدل شغل الفريلانس مش ثابت للأسف، وبالتالي لازم تعمل حساب الشهور اللي ممكن ميكونش الدخل كبير عشان تقدر تصرف مصاريفك الشهرية الأساسية، بجانب مصاريف تانية زي صيانة الكمبيوتر ومصاريف اشتراك النت وفاتورة الكهربا وغيرها من التزامات ضرورية وأساسية بصرف النظر عن معدل الشغل.
2- مافيش امتيازات الشركات
يعني مش هتلاقي إجازات مدفوعة زي الأجازات المرضية، أو تأمين صحي ليك ولأفراد أسرتك، أو تأمينات عشان المعاش مستقبلاً، علشان كدة لازم تشيل جزء من دخلك تحسباً للطوارئ اللي زي دي.
3- مشكلات صحية
كتر القاعدة قدام شاشة الكمبيوتر لساعات طويلة بتسبب متاعب وآلام شديدة في فقرات الضهر والرقبة ووجع العظام، وكمان للأسف ممكن يزيد وزنك بسبب أكل البيت، علشان كدة لازم تاخد بالك من أكلك يكون صحي، وتدي جسمك فترات روحة ونوم مناسبين.
4- اجتماعيات أقل
بسبب عدم وجود مجتمع شغل، فبالتالي مبيكونش عندك أصدقاء العمل، وشغلك ك فريلانسر بيقلل احتكاكك بالناس، فلازم تكون مهتم جداً بحياتك الأسرية والاجتماعية من الناحية التانية عشان متتحولش بالوقت لانسان وحيد.. التوازن بين شغلك وعلاقاتك مهم جداً.
5- تحفيز وتشجيع نفسك بنفسك
ممكن تعدي عليك أيام صعبة تكون فاقد الشغف في العمل، أو غير مؤمن بقدراتك، ولأن مافيش مدير فوقك يقدر يشجعك فأنت محتاج تكون دينامو نفسك، تكون عارف ومؤمن بقدراتك ودايماً تفكر نفسك ليه اخترت تكون فريلانسر، ومتستسلمش لأي أفكار سلبية، وممكن تستعين بصديق يحفزك أو أي شخص مؤمن بيك وموهبتك.
وأخيراً، مش كل الناس تقدر تكون فريلانسر، وكذلك مش كل الناس بتحب تكمل حياتها في شغل روتيني من 9 الصبح ل 5 مساءاً، هي عملية اختيارات، انت لازم تحط قدامك العيوب والمميزات وتدرسها كويس، وتحسب مصاريفك الشهرية وتعمل حسابك تدخر كمان، ده غير ظروفك الحياتية اللي ممكن تكون بتحتم عليك اختيار معين أكتر من التاني، وساعتها تقرر انت ممكن تكون موظف في شركة ولا فريلانسر؟