13 فكرة للدعاية لو انت صاحب Small Business

المشروعات الصغيرة small business مهمة جداً لدرجة انها ممكن تأثر في اقتصاد دول كبيرة زي الولايات المتحدة الأمريكية اللي فيها أكتر من 32 مليون مشروع، وطبعاً كل مشروع له تأثيره على الاقتصاد. علشان كدة لو انت بتفكر تفتح مشروع صغير خاص بك بنشجعك جداً تبدأ، لأن الـ Small Business  بقى ليها وجود كبير في مصر والدول العربية في العشر سنوات الأخيرة، وخصوصاً بعد جائحة الكورونا ناس كتير اتجهت لتنمية مواهبها وعليه واكتشفوا انهم ممكن يكونوا من أصحاب المشروعات الصغيرة دي، وبالفعل نجحوا جداً في المجال ده. لأن العمل الحر مجالاته مفتوحة وكبيرة.

علشان كدة هنقدملك بعض الأفكار اللي ممكن تساعدك توسع نشاطك ويكون ليك وجود وشكل دعائي ناجح، وطبعاً مش كل الأفكار ممكن تكون مناسبة لنوع نشاطك، انت اللي عليك تقرر الأفكار المناسبة ليك.

1- احكي قصة نجاحك

الناس بتحب القصص، وبتحب قصص النجاح والنهايات السعيدة جداً، علشان كدة ممكن بعد فترة من نجاح مشروعك تبدأ تحكي قصة نجاحك، إزاي بدأت الفكرة؟ وليه بدأت وإزاي؟ وممكن تحكي بتفاصيل عن العقبات والمشاكل اللي واجهتك وإزاي انتصرت عليها.
قصص النجاح من أكتر الحاجات اللي بتربط العملاء بيك، وبيقربك منهم وممكن تكون قدوة ومصدر إلهام لشخص عايز يبدأ مشروع مشابه لمشروعك.

2- اعمل قائمة بأكثر الأسئلة المتكررة FAQ

جمع كل الأسئلة اللي بتتكرر عليك واعملها في قائمة FAQ– Frequently Asked Questions، لأن دي هتخلي العملاء بتوعك يعرفوا عنك معلومات أكتر من خلال الأسئلة اللي ممكن متجيش في بالهم وهيعرفوا خدمات بتقدمها ممكن يكونوا مش عارفينها، وكمان هتقلل من عليك إجابة الأسئلة المتكررة.

3- صوَّر فيديوهات و ستوريز

الفيديوهات وال reels وال ستوريز بقوا أهم وأسرع من البوستات والكلام المكتوب، علشان كدة لازم تصور جزء من انتاج ال Small Business بتاعك وتحطه في ستوريز بشكل يومي، وكمان تهتم تصوَّر فيديوهات عن نشاطك وخطواتك والنتيجة النهائية، ده يبيساعد في نشر نشاطك بشكل كبير في السوشيال ميديا.

4- اعرض الكواليس

من وقت للتاني اكسر فكرة الفيديوهات الروتينية بعرض الكواليس قبل ما منتجك يشوف النور، ممكن تشارك العملاء أوقاتك الصعبة وتعبك خلال التحضيرات، والمشكلات اللي ممكن تكون بتواجهك.
دي بتقرب العملاء منك وبتخليهم يقدروا أكتر فكرة المجهود المبذول اللي يمكن يكون مش متشاف قبل ما المنتج الأخير يوصل للعملاء.

5- انشر الـ Feedbacks

تعليقات الناس وآرائهم في نوع الخدمة أو المنتج اللي بتقدمه مهم جداً،لأن التعليقات دي بتدي مصداقية وأمان للي بيتابعوك، وكمان بيشجع ناس تانية تدخل على البروفايل بتاعك ويطمنوا لمنتجاتك وبالتالي هتزود ال followers  بتوعك من خلال ثقة ناس تانيين في منتجاتك.

6- اعمل مسابقات Give Away

كلنا بنحب الهدايا، علشان كدة انت ممكن توفر فرصة سهلة وبسيطة للناس انهم يدخلوا مسابقة ويكسبوا. مسابقات ال Give Away فكرتها انك بتقدم هدية انت بتحددها من خلال شروط بسيطة بتساعد اكتر على نشر الأكونت بتاعك في السوشيال ميديا من خلال شروطك زي ال شير ومنشن لأصحابك وهكذا..

7- اعمل استطلاع رأي

من وقت للتاني ضروري تتأكد ان العملاء بتاعك راضيين عن مستوى الخدمة اللي بتقدمه، وممكن تعمل استطلاع رأي عشان تشوف مدى رضاهم عن الخدمة بتاعتك، وكمان لو عندهم اقتراحات أو مستنيين منك منتجات تانية تخص الـ Small Business  بتاعك، ده بيقربك أكتر من العملاء وبيحسسهم أن آرائهم وطلباتهم مسموعة ومستجابة.

8- الأحداث والأخبار العالمية

شارك العملاء بتوعك أهم الأخبار اللي لها علاقة بالمجال بتاعك، وأحدث الأدوات والاكتشافات والمنتجات اللي تخص مشروعك، وكمان شاركهم الأحداث والأيام العالمية المهمة والأعياد.

9- أساطير وشائعات لها علاقة بمشروعك

دايماً بيكون فيه قصص خيالية حوالين أي نشاط أو منتجات، انشر كل المعتقدات الغلط والتصرفات الغير صحيحة اللي تخص مجالك، ولو فيه أساطير ممكن تكتبها أو تحطها ك ستوريز، الحاجات دي بتكون catchy  جداً للعملاء وبيحبوا يسمعوها ويتفرجوا عليها، وبيديهم انطباع انك عندك تاريخ المجال ومثقف وعندك كل ال updates.

10- ليه تختارنا؟ Why Choose Us؟

مهم جداً تأكد من فترة للتانية عن مميزاتك ك Small Business، وتقول بصراحة للعملاء ليه ممكن تختارنا احنا مش أي حد تاني بيقدم نشاط مشابه، والطريقة دي بتخليك تعدد من مزاياك و عروضك اللي ممكن تكون مش موجودة عند حد منافس ليك.

11- أعلى المنتجات بيعاً

لو عندك نوع معين من المنتجات الأعلى مبيعاً، ممكن تستغل الفرصة دي وتعلن ده لجمهورك، لأن ده بيشجع فئة تانية انها تشتريه وتقبل عليه، وبالتالي هتزود مبيعاتك أكتر.

12- بعض الأخطاء في الاستخدام

ممكن تنشر بعض الأخطاء الشائعة في الاستخدام لمنتجاتك أو في التعامل مع الخدمة اللي بتقدمها أو في نوع الـ Small business بتاعك، وتوضح للناس إزاي يتعاملوا صح وايه الطريقة الصحيحة للاستخدام.

13- انشر حاجة ملهاش علاقة بمشروعك

ممكن تستغل الإجازات والويك اند انك تطلع بره دايرة الشغل خالص، وتنشر حاجة لذيذة مالهاش علاقة اطلاقاً بطبيعة ال Small Business  بتاعك، وممكن تشوف إيه التريند الفترة دي وتحطه أو تحط memes. ده بيكسر الشكل الروتيني لصفحتك، وبيخليك قريب أوي من الجمهور عموماً والشباب خصوصاً.

دي شوية أفكار ممكن تزود بيها انتشارك و دعايتك لمشروعك، هنستنى منك انك تقولنا على أفكار تانية جربتها في الـ Small Business  بتاعك ونجحت.