ليه اعمل ويب سايت طالما صفحة الفيسبوك شغالة؟

بعد الواقعة الشهيرة يوم 4 أكتوبر لما تعطل موقع فيسبوك والخسارة المادية اللي حصلت، بدأت تظهر شوية تساؤلات زي هل ممكن الحادثة دي تتكرر تاني ونتفاجئ ان فيسبوك وقع بدون أي مقدمات؟ وهل فيه بديل وقتها؟
المشكلة في تعطل موقع فيسبوك انه أصبح بالنسبة لناس كتير مش مجرد موقع تواصل اجتماعي، لكنه أصبح موقع تواصل تجاري كمان، بيبعوا ويشتروا من خلال صفحاته أو جروباته، وده لأنه بيوفر سهولة في إنشاء جروب او صفحة وعرض أي منتجات عليهم، وناس كتير جداً في السنين الأخيرة بدأوا يركزوا أكتر في تحويل كل نشاطهم أونلاين من خلال فيسبوك.

لكن في الواقع ان الاعتماد بشكل كامل علي فيسبوك هو خطر كبير بيهدد تجارتك بالرغم من المميزات الكتير السريعة والسهلة اللي بيوفرهالك موقع فيسبوك وغيرها من المواقع التجارية زي أمازون، وده اللي هنتكلم عنه بالتفصيل. 

إيه المميزات اللي فيسبوك بيقدمهالي؟

1- سهولة انشاء صفحة أو جروب تبيع من خلاله في دقائق معدودة

2- مافيش تكلفة مادية لبدء أي نشاط تجاري

3- تقدر تحط عدد كبير من الصور والفيديوهات.

4- مافيش سقف محدد لعدد المعجبين بالصفحة بتاعتك (الصفحة الشخصية اقصي عدد 5000 إنما الصفحات العادية مفتوحة العدد) 

ايه المميزات اللي فيسبوك مش بيوفرهالي؟

1- حرية اختيار طريقة عرض المنتجات بالشكل والألوان المفضلين بالنسبالك

2- صعوبة العثور علي منتجاتك ونشاطك في محركات البحث جوجل (وقد يكون مستحيل)
3-  بتحتاج وقت كبير للتواصل مع العملاء للرد علي استفساراتهم  لان التواصل عن طريق الكومنتات او الرسايل وساعات بتكون محظور.

4- مافيش امكانية بحث تفصيلي جوة الصفحة او الجروب.. هتحتاج تبحث كتير عشان توصل لصورة قديمة او لكومنت مكتوب عليه السعر.

5- انت تحت رحمة قوانين المواقع دي.. أي تغييرهتكون مضطر توافق عليه حتي لو مش مقتنع بيه.

6- صفحتك او الجروب بتاعك ممكن يتقفلوا لاي سبب ومتقدرش ترجعهم.

وبعد ما عرضنا المشكلات اللى ممكن تواجهنا لازم نفكر في حلول تكون بديلة وقوية، وكان أقوي حل هو عمل موقع إلكتروني (ويب سايت) لشركتك. 

ليه اعمل ويب سايت؟؟

الويب سايت بيسيب انطباع للناس ان نشاطك هو مصدر ثقة، خصوصاً لو معمول بشكل حلو ومنظم يشد العميل.
وتقدر بسهولة تظهر على محرك البحث زي جوجل وغيرها من خلال اعدادات ال seo، وبالتالي عدد أكبر بكتير من الناس الغير متوقعة هتدخل علي الويب سايت بتاعك (لازم تجرب).

الويب سايت بيوفرلك انك تحط كل الداتا الخاصة بمنتجاتك زي المقاسات المتاحة والألوان والاسعار بالشكل وطريقة العرض اللي تحبها
كمان تقدر تحط عليه العروض والأكثر مبيعاً وطريقة الشراء اللي تناسبك

الويب سايت بيساعدك تكبر ونشاطك يكبر.. إنما صفحة الفيسبوك مهما زاد عدد متابعينها هتفضل لسه جوة نفس الدايرة
الويب سايت متاح 24 ساعة إنما الفيسبوك ممكن يقع تاني 😀

علي فكرة الويب سايت كمان ممكن يقع.. لكن الفرق هنا ان ال developer  بتاعك هيقدر يشوف فين المشكلة ويحلها، إنما لما موقع كبير زي فيسبوك يقع مستحيل هتقدر تحلها.. واستني بقي لما يحلوا المشكلة.. محدش عارف بتتحل إمتي ولا أصلاً كانت إيه المشكلة؟ – هو صح يوم 4 أكتوبر لما فيسبوك وقع كانت المشكلة إيه ؟-
شوفت انت مش عارف إيه اللى حصل يبقي إزاي تعتمد عليه في شغلك؟

لو عايز تعرف أكتر عن عروضنا وإزاي تعمل ويب سايت ونقدر نساعدك فية .. تواصل معانا من هنا