إيه عيوب تحديثات جروبات الفيسبوك الأخيرة؟

في أكتوبر 2021 أعلن فيسبوك إجراء تحديث على الجروبات الموجودة عليه، وكان واحد من أشهر التحديثات هو تحويل الجروبات كلها إلى الوضع العام public group.
وبين مؤيد ومعارض اتحولت الجروبات كلها public إلا لو اخترت بنفسك ترجع اعدادات الجروب على وضعها القديم.
والحقيقة أن بسبب التحديث ده والتحديثات التانية شوية مشاكل هتعيقك عن نشاطك أو تجارتك اللي من خلال جروبات الفيسبوك.. هنشوفها مع بعض في المقالة دي.

لو الجروب بتاعك اتحول public مش هيرجع private تاني

يعني لو حضرتك وافقت بالتحديث الجديد والجروب بتاعك بقي public مش هتعرف ترجعه private تاني، مع ان الاختيار ده كان متاح زمان انك تجرب في وقت تقفل علي الجروب، والتحديث ده هيخلي الجروب بتاعك بابه مفتوح أي حد مش مشترك فيه يقدر يشوف كل البوستات والكومنتات (خد بالك مش دايماً دي ميزة لانك متعرفش نية وشخصية كل مستخدمي فيسبوك)

حظر الأشخاص بناءاً على ذكاء الفيسبوك الاصطناعي

يعني ايه الكلام ده؟ يعني فيسبوك مش هيستني reports من ناس على بوست معين عالجروب بتاعك، لكن الذكاء الاصطناعي للفيسبوك هيقدر يحدد إذا كان المحتوى ده فيه انتهاك ضد قوانين فيسبوك أو لا.. وساعتها هيعمل حظر للشخص 30 يوم، وممكن يطلعوا الشخص ده من الجروب ده.

تقليل المحتوى الضار أو المعلومة الخاطئة

فيسبوك بيقول انه أزال في العام الماضي حوالي 12 مليون بوست جوة الجروبات لوجود خطاب كراهية.
وده معناه ان فيسبوك من حقه يشيل أي بوست ليك إذا كان -من وجهة نظر فيسبوك-  بينشر معلومات ضارة أو خاطئة!  وهنا مشكلة ان المعلومات دي فيسبوك بيحكم عليها أنها ضارة أو خطأ من خلال قوانينه هو.

فيسبوك ممكن يحذف الجروب كله!!

فيسبوك ممكن يحذف الجروب كله -مهما كان عدد أعضائه- إذا انتهك قواعد فيسبوك، وفي خلال العام الماضي تم خذف فعلاً أكثر من مليون جروب!

وكمان من التحديثات انك لو أدمن وقبلت كذا مرة بوستات تنتهك معايير المجتمع (من وجهة نظر الفيسبوك) هيتم حذف الجروب بتاعك، أو تكون فاتح نشر البوستات بدون موافقتك هيعرض الجروب بتاعك للحذف لو كانت البوستات مسيئة.

ولو انت ادمن أو مشرف لجروب تم حذفه.. هيتم منعك من إنشاء جروب لفترة من الوقت.

أرشفة الجروبات اللي بدون ادمن لبعض الوقت

لو ادمن الجروب تم إيقافه لأي سبب، سيتم أرشفة الجروب لوقت حتي يتم احتيار ادمن أو مسئول تاني.
وطبعاً ده هيأثر علي الجروب بتاعك.. لان الوقت ده انت هتخسر تفاعل وهتخسر بيع وشرا (لو جروبك تجاري)

حذف الجروبات الصحية من الاقتراحات

فيسبوك شايف انك مستخدميه لازم ياخدوا معلوماتهم الصحية من مصادر موثوقة مش من خلال الجروبات، علشان كدة شال الجروبات الصحية من التوصيات recommendations.. ولكن لسه ممكن تعمل دعوة للاصدقاء للدخول للجروب وهيظهر في البحث.

محاربة التضليل

أي جروب بينشر معلومات مضللة (من وجهة نظر الفيسبوك) بشكل متكرر بيتم حذفها، والجروب نفسه مش بيتم اقتراحه على المستخدمين.. وكمان هيقلل الاشعارات notifications اللي بتوصل للمشتركين، ده غير ان هيظهر فوق البوست بتاعك انه بوست يحتوي على معلومات مضللة!!

التحديثات الخاصة بجروبات الفيسبوك قد تكون حماية لفئة كبيرة من المستخدمين، لكنها بتخليك كصاحب جروب تحت رحمة القوانين اللي بتوضعها شركة فيسبوك واللي كل شوية بتتغيَّر!.. وده ممكن يأثر علي نشاطك التجاري أو يعطله ويوقفه فجأة بدون أي إنذار.
جروبك اللي بتشتغل منه على فيسبوك مش أرض ثابتة تكون مطمن جواها، القوانين كل شوية بتتغير وبتتعدل، وكلها بتتبع سياسات تخص وجهة نظر فيسبوك!!

ده غير شوية اسباب تانية ذكرناها في مقالة ليه اعمل ويب سايت طالما صفحة فيسبوك شغالة؟

الحقيقة كل مدى احتياجك كصاحب نشاط بتديره من خلال فيسبوك هيزيد انك تحوّل نشاطك بره دايرة فيسبوك بقوانينه، هتحتاج تخلي نشاطك اونلاين من خلال ويب سايت انت تحكم قوانينه وطريقة عرضه ومتكونش تحت رحمة حد!

لو عايز تسألنا عن ويب سايت خاص بيك تواصل معانا من هنا

المصدر :
https://about.fb.com/news/2020/09/keeping-facebook-groups-safe/