في عامه ال 24 .. أسرار لا تعرفها عن جوجل
في عام 1998 ظهر أقوى محرك للبحث، وكلمة جوجل مشتقة من المصطلح الرياضي “جوجول” ومعناها 1 متبوعاً ب 100 صفر، وكان هدفه إنشاء محرك بحث بمعلومات منظمة وإمكانية الوصول إليها بسهولة، واستطاع في وقت قصير أن تزيد شعبيته أكثر من مواقع كبرى ك yahoo و hotmail وقتها.
عام 2006 تم اعتماد كلمة جوجل في قاموس أوكسفورد وظهرت الجملة الشهيرة Google it كفعل مثبت للبحث من خلال موقع جوجل. ودلوقتي أصبح جوجل الموقع الأشهر والأسهل لإجابة جميع التساؤلات حول أي موضوع في كافة المجالات، والآن يمتلك أكتر من 200 فرع في 50 دولة بعمالة حوالي 60 ألف موظف.
علي الرغم ان جوجل لا تقدم إحصائيات دقيقة عن المستخدمين، إلا ان يمكن القول ان هناك تريليونات من عمليات البحث سنوياً وحوالي 63000 عملية بحث كل ثانية ب 150 لغة مختلفة في 190 دولة حول العالم.
وبرغم انتشار جوجل واستخدامنا اليومي له، إلا أن هناك بعض الأسرار الغير معروفة الخاصة به مثل:
1- استخدام (+) أو (-) للحصول على نتائج بحث أفضل
ودي خاصية بتجعل البحث متخصص أكتر، يعني لما استخدم (+) بطلب من جوجل يبحث هم موضوع كبير لكن يتخلله خصوصاً الكلمة اللي انا اختارتها (مثال: منهج العربي+ سنة رابعة) كدة هيظهرلي مناهج العربي بتاعت سنة رابعة بس لاني طلبت من جوجل التخصيص ده.
اما استخدام (-) فهي للاستثناء في البحث (مثال: انواع دايت – كيتو) يعني طلعلي كل انواع الدايت في البحث ماعدا نوع الكيتو، لكن فيه ملحوظة مهمة هنا، ان (-) يفضل استخدامها في البحث باللغة الانجليزية لضمان نتايج أفضل.
2- تحديد نوع ملفات البحث
لو محتاج أبحث فقط عن نوع ملفات معين فقط وليكن pdf، بكتب الكلمة البحثية بالعربي او الانجليزي وجنبها (filetype: pdf) هيطلعلي في كل النتايج نوع الملف اللي انا اخترته.
3- استخدام ” ” للحصول على بحث مطابق تماماً
علامات التنصيص بتضمنلك ان جوجل هيبحث عن اللي انت كتبته داخل علامات التنصيص بالظبط بدون أي إًضافات، وده مناسب جداً في البحث عن النصوص أو المقالات والآيات الدينية والأقوال المشهورة، بتضمن بعلامات التنصيص عدم حدوث أي خطأ أو تبديل في أي حرف أو كلمة.
4- استخدام (site:) للبحث داخل موقع معين
عشان لو هتعمل بحث جوة موقع معين فقط، تقدر تستخدم خاصية (site:) للبحث فقط جوة الموقع ده.
ولو عايز مواقع مشابهة لموقع معين تقدر تستخدم الخاصية دي (related:) ودي بتكون مفيدة جداً في الأبحاث العلمية اللي بتحتاج مصادر موثوقة وما يشابهها.
5- التحويل بين العملات والأوزان والمقاييس
جوجل بيديلك خاصية التحويل من عملة لأخرى بسعر اليوم عن طريق انك تكتب مثلاً (usd to euro).. كدة هو هيفتحلك في النتايج مكان تكتب فيه الدولار الأمريكي ومكان لليورو وتبدأ تشوف التحويل بين العملات هيساوي كام بسهولة.
وبنفس الطريقة نقدر نحوِّل الاوزان (زي الجرامات والباوند..) والقياسات العالمية (زي القدم والمتر..).
6- شهادات التعلم من جوجل
هي شهادات معتمدة من شركة جوجل للتكنولوجيا بتقدمها للراغبين في التعلم التطبيقي بسوق العمل بدلاً من التعليم الأكاديمي النظري فقط، وأتاحت فرص للعمل بعد حضور 6 شهور دورات تدريبية تعادل 4 سنوات البكالوريوس أو الليسانس، فهي فرصة ممتازة لكل الشباب اللي بيدوروا علي شغل مناسب لسوق العمل حالياً، والدورات دي تشمل:
1. Data Analysis
2. Project management
3. UX designer
4. IT Support
7- ألعاب أتاري
تقدر تاخد بريك وتلعب لعبة من العاب الأتاري بتاعت زمان جوة جوجل نفسه، هتكتب في البحث (atari breakout) وبدلاً من كلمة بحث هتختار (ضربة حظ ـ أو I’m feeling lucky) هتلاقي طلعلك لعبة أتاري بتاعت زمان تقدر تلعبها ويطلعلك نتيجة كمان.
وممكن تلعب لعبة pacman بنفس الخطوات اللي فاتت بردو ومتنساش انك بتختار (ضربة حظ ـ أو I’m feeling lucky) عشان تقدر تلعب اللعبة.
وكمان تقدر تلعب لعبة space invaders لما تكتب في السيرش (elgoog space invaders) وبردو تختار (ضربة حظ ـ أو I’m feeling lucky).
جوجل مليان خبايا وأسرار ويوم عن يوم بيتطور أكتر، والحقيقة انه الموقع الأشهر والأنجح واللي بيحتفل السنة دي بعيد ميلاده ال 24 وسط سلسلة هائلة من النجاحات والتطورات واللي متوقعين انها تزيد وتكبر أكتر.